Лепшокъланы Окъуб

БАЛАЛАГЪА

Хар бир джан да ата – анадан джаратылыб
Сабий болуб ортабызда ёсюб келед
Дау салмагъыз сени баланг аманды деб
Ким болурун аны Аллах кеси билед
* * *
Аны ючюндю хар ана да махтау салыб
Мийик тутуб джаратылгъан балаларын
Аз тюйюлдю ортабызда зыраф ёсген
Инджилтгенле аталарын-аналарын
* * *
Тутма мийик салма махтау баланга
Эл джамагъат берир махтау балалагъа
Эл махтаса олду насыб балаланы
Аладыла бизге ишлерик къалаланы
* * *
Ёмюр деген хар адамгъа бир кюн кибик
Дау салмайыкъ биреулеге джашау джолда
Мадар болса заран салма гяургъа да
Тюз сенича бир джарлыды ийнан ол да.
* * *
Ач джаланнгач этмейим деб дыгаласда
Ана беред баласына джылыучугъун
Ийнаныгъыз акъбурун да кем сюймейди
Кеси табыб сют ичирген гылыучугъун
* * *
Эслеймисиз терек башда къара къаргъа
Баласына чыммакъчыкъ деб чам ат беред
Акъ къара да ата-анадан джаратылыб
Джашауларын не болурун Аллах билед

КЪЫЗГЪАНЧ

Мадар болса айтханыма тынгылагъыз
Къызгъанч деген не болгъанын ангылагъыз
Ырысхынгы сен басдырма чибин аугъа
Эркин болсанг ол чыгъарыр сени таугъа
* * *
Къысыб турма къолларынгы ач да бир къой
Бармакъланы тёрт джанына чач да бир къой
Кюн бир тийсин аязынгы арасына
Себеб болур джюрегинги джарасына
* * *
Къутулалсакъ къызгъанчлыкъдан себеб болур
Мадар табсакъ бу ауруугъа санынг солур
Джокъ эссе да барды деб тур мени затым
Чомартлыкъгъа чыгъар ючюн сени атынг
* * *
Къызгъанч адам джюз тауукъгъа гурт салдырыр
Къызгъанч Адам джюджеклерин къушха алдырыр
Тилеб барсанг минг къоюндан бирин бермез
Берсе да кёзлерине чырт джукъу кирмез
* * *
Ырысхыгъа Аллах борчлуд мал кёз болма
Къорарыкъ зат белгилиди артха салма
Миниллик ат минилгинчи тай болады
Керти айталла къызгъанч Адам бай болады.

**************************

Кёре тураса кемликлени,
Сынай тураса терсликлени,
Адам бирде сынад, джарсый, эзиле.
Туз себилген кюртча эрий,
Джукъарады адам кёлю,
Азаялла, таркъаялла сезимле.

Тюздю, джашау къыйын джолду,
Хар атламы тикли къолду,
Къадарыбыз къаршчы тургъан сынамды.
Алай кёлню сууутмайын,
Талпыгъанын къурутмайын,
Адамлыкъны шартын тутхан — адамды.

Добавлено (01.02.2011, 16:51)
---------------------------------------------
Къулийланы Къайсын

Дунияда къартлыкъ да, елюм да барды,
Бушуу андан думп болмайын турады,
Ол, тенгиз кибик, таркъаймай къалады,
Дунияда къартлыкъ да, елюм да барды.

Анангы чачы, къышча, агъарады,
Сора емюрге анасыз къаласа,
Бир кюн сюйгенингден айырыласа,
Дунияда жарсыу да, бушуу да барды.

Дунияда къыйынлыкъ, ачыу да барды.
Биз барыбыз да тезебиз алагъа.
Жарсыудан етюп, къарайбыз да алгъа
Къууанч да, Казбек тауча, агъарады!

ОНТЕРТ ДЖЫЛ

Онтерт джылынг онтерт емюр керюнеди.
Миллетими эси энтда белюнеди.
Джашайбыз биз джюрекледен унуталмай
Бир азчыкъ да эсибизден къуруталмай

Зар джюрекле джуртубузгъа чурум излеб
Кез къаратыб, эртделеден кесин билеб
Кеб заманны мадар табмай тургъандыла.
Таб тюшгенлей кюч-къарыуну бургъандыла.

Не гитченг да саутланы ере туруб
Тебмей тауча келген джаугъа аллын буруб
Ол кезюуде бизге атаб сатлыкъ атны
Алдырмайын джаныбызгъа аз да затны

Рысхыбыздан къурулай къалыб кетгенбиз
Джашау къураб дагъыда биз елмегенбиз
Сау къалгъанла джуртха къайтыб келгенбиз
Энди кюнню кекде чуакъ кергенбиз.

Добавлено (01.02.2011, 20:37)
---------------------------------------------
Лепшокъланы Окъуб

КЪАРГЪА

Эки емюрню джашадым мен дунияда
Таб артыкъ да бола болур джашауум
Джашлыкъ деген этдиреед кеб затны
Ийнаныгъыз аман тюл-эд джашауум

Эки чалман чертлеуюкден этилиб
Къымылдатсанг мор букъусун тегеди
Бек джаратыб эртде эшилген чалманны
Бир къарт къаргъа мюйюшюне чегеди

Къарным тюйюб бир аз къарыу алалсам
Тереклеге мийигирек къонарэм
Эртдедеча болса бюгюн къарыуум
Тегерекде бир джукъ къоймай тонарэм

Мешхут къаза тургъан бир гурт тауукъну
Эси кетиб джюджеклерин санайды
Къарным тойса табылыр эд бир бутакъ
Ийнаныгъыз джашау деген былайды

Ма бюгюн а бир чириген чалманнга
Фатарымы джарашдырыб салгъанма
Къанатланы тыялмай сыртымда
Ийнаныгъыз онгсуз болуб къалгъанма

Армау болуб сагъышланыб тургъанлай
Бир къуш джетиб алыб кетди джюджекни
Тырнакълары азыгъына илиниб
Къарт къаргъаны джарыб кетди джюрегин

Не къарыуун аямайын къарт къаргъа
Мыллык атыб къушну сюрюб джетгенди
Сау таукъдан манга бир джукъ къалыр деб
Онгсуз болуб тюз къашына чекгенди

Келмегенме сени сюрюб заукъ бла
Ох ит болдукъ экибиз да бу таукъ бла
Тилекчиме юлюшюмю къой манга
Джукъ къабмасам чыгъалмазма мен танга

Муну айтханын къулакъгъа да алмай къуш
Этин ашаб сюеклерин бош этди
Джарлы къаргъа учалмайын алайда
Чекген джерин емюрлюкге къош этди

Елмесенг да къартлыкъ сени унутмаз
Джылынг келиб санынг болса санга джюк
Хар бир джан да сынгар кеси къайгъылы
Онгсуз болсанг киши бермез бир биртюк

Добавлено (01.02.2011, 20:51)
---------------------------------------------
АЛАННЫ АЛГЪЫШЫ.

Хубийланы Магомет.

Бу Теберди ёзенде къыйынлыкъ киши сынамасын,
«Джашлай ёлген»-деб, киши джыламасын,
Бу элден насыб къурумасын,
Арбазлада ит улумасын.
Бу джангы джуукъла
Джангыра - джашнай барсынла,
Ауруудан – талаудан кенгде къалсынла,
Эм бай адамла былагъа джутлансынла,
Эм насыблыла былагъа сукълансынла.
Къарангы кече толгъан ай чыгъыб,
Джол танытханча,
Эртден бла кюн тийб,
Дунияны джарытханча,
Бу экисин кёргенлей,
Мыдах джюрекле джарысынла,
Игиле – ашхыла экисине джалынсынла.
Кёб болсунла тёрде олтургъан къартларыбыз,
Берекет болсун этген хантларыгъыз,
Кёгетден толсун садларыбыз,
Игилик бла айтылсын атларыгъыз.
Къралыбыз къралладан баш болсун,
Джюрегибиз кюнден-кюнге джаш болсун.
Келин эгеч болсун, кюеу къарнаш болсун,
Аман иннетли бу элден тас болсун.
Къобан суу ызына айланыб,
Миннги таугъа миннгинчи,
Чегетде кийикле юсюне кийим кийгинчи,
Кече арасында бир исси кюн тийгинчи,
Уруш отун сынамайын къалайыкъ,
Къуанчлада алгъаш аякъ алайыкъ,
Бир-бирибизге джарыкъ бетден къарайыкъ!

КЪАРТ АТАМА

Дин ахлулу орта бойлу керти киши
Бир адамгъа болмагъанды заран иши
Хаар ушагъын алгъыш бла бошай эди
Ёзге болмай файгъамбаргъа ушай эди.
* * *
Ушакъ этсе къатындагъы адамлагъа
Бек сюеме деучен эди джашымы
Къуанса уа мылы тарты кирпиклери
Ариу айтыб кеб сылыгъанды башымы
* * *
Бир хойнухчукъ эшиб берди ойнаргъа деб
Тилимдиси къамчи сабха тагъылыб
Суу бузласа тигелеем ёзеннге
Ойнай эдим сыйдам бузгъа джыгъылыб
* * *
Зикир айтса тынгыларэнг танга дери
Эсинг кетиб аны ариу макъамына
Шукур этиб бошай эди зикирлерин
Къолун салыб Ислам динни къуранына
* * *
Уллу Аллахды хар адамгъа джазыу Берген
Ол джазыуну бир адам да билмез кеси
Хоншу тийре бары оноу сора элле
Бек терен эди къарт атамы акъылы эси
* * *
Адам улу быллай бир сый къалай беред
Туудугъуна баласыны баласына
Мени кёрсе къар атамда къуанч уллу
Келген кибик бир хан къонакъ къаласына
* * *
Джылла оздула мен да болдум къарт ата
Тырмашама аны кибик болургъа
Ата намыс хар адамгъа тёреди
Туудукълары тобугъунда солургъа.
********************

Добавлено (03.02.2011, 22:09)
---------------------------------------------
Elou, Къаргъа бошду,берю хапар деб бир назмусу барды аны керти да джаратырса деб келеди келюме. Аджашдыргъанмада табалмай турама.Табсам окъуб бир керюрсе

Добавлено (03.02.2011, 22:41)
---------------------------------------------
Лепшокъланы Окъуб.

ЭСКИ ДЖУРТУМ

Джан сакълатхан джугъутургъа буулагъа
Кемсиз ариу къаяларынг тауларынг
Дарман сууунг Боркъулдауукъ боркъулдаб
Дуниягъа белгилиди сууларынг
* * *
Гараларынг секирелле боркъулдаб
Суу ташлагъа къызыл оба кийдире
Санга ушаш дунияда джер болмаз
Хар келгеннге сен кесинги сюйдюре
* * *
Саугъа санга сейир джуртум къарачай
Келген къонакъ беред саннга керти сый
Тауунг тюзюнг ташынг-суунг ауушунг
Кёб джерледе эшитиледи тауушунг
* * *
Кёрмеген кёз кёрген кёзге ийнанмаз
Хапар айтсанг ийнанмайла биреуле
Ауушларынг булутлагъа тирелиб
Иш этилиб салыннганча тиреуле

***********************

Добавлено (04.02.2011, 22:21)
---------------------------------------------
Семенланы Сымайылны Минги Таугъа эткен джыры

Сен кёкге джете мийиксе
Кавказ туланы ичинде.
Мияла кибик джылтырай,
Къанга бузларынг юсюнде.

Юсюнгде барды акъ тонунг,
Сен джай да къыш да киесе.
Кюн бузулургъа тебресе,
Боран этерге сюесе.

Кюн ариу, чууакъ тургъанлай,
Тохтамайды боранынг,
Джай да, къыш да эримейди
Юсюнгдеги бузларынг.

Тёгерегингде тогъай отлайла
Алтын мюйюзлю кийикле.
Сени тёббенге чыгъыучандыла
Бёгекле бла джигитле.

Кийик бууларынг ёкюредиле
Къонгурауланы къакъкъанча,
Джугъутурларынг турушадыла
Атлыла чарсха чабханча.

Къабланларынг, асланларынг
Бугъойларынга кирелле.
Покунларынг, гуждарларынг
Адам джыйыны билелле.

Айюлеринг мурулдайдыла
Шындыкъ чегетни ичинде.
Бёрюлеринг къалкъыйдыла
Къойланы кёре тюшюнде.

Кёк джашнаса сызгъыралла
Этеклеринг джел эте...
Менден кючлю джокъду деб,
Кесинг кесинге кёл эте.

Къабланларынг къараб туралла
Беклеге кириб, мынгайыб,
Борсукъларынг, тюлкюлеринг
Джууукъ барыргъа уялыб.

Къанкъазларынг къанкъылдайдыла,
Чын тауукъларынг джырлайла.
Къаргъаларынг къаркъ-къуркъ эте,
Мыллыкъ табмайын джылайла.

Кёгюрчюнлеринг джюуюлдейдиле
Кюнюнг джылтыраб къакъкъанлай,
Маралларынг отлайдыла
Гелеу кырдыкга батханлай.

Чыпчыкъларынг, чаукаларынг
Будай ындырны чёблейле.
Арарат бла Казбек тау
Санга тюгел джетмейле.

Уллу къушла санга къонсала
Юйле кибик къарашыб,
Джур текеле джыгъылсала
Сюрюулеринден аджашыб.

Кюз артынгда турналарынг
Аууб кетелле тенгизге,
Къышха хазыр болугъуз деб,
Эскертиученсе сен бизге.

Сенден сора къайсы тауду
Ариулукъ бла бай болгъан,
Башы къыш болуб, бели джаз болуб,
Этеклерингде джай болгъан?

Минги Тау бла Казбек Тау,
Арагъыз ариу джибек ау...
Сен кийиз бёркню агъарта,
Этегинг джашил къатапа.

Сен джулдузлагъа джанаша,
Къалгъанла сенден алаша,
Бир-биригизге къараша,
Къалай сейирсиз, тамаша!

Бузну, къарны джыйыучу,
Башынга булут къонуучу,
Тёгерегине басыныб
Таулула къараб тоймаучу.

Къыш айланы бораныса,
Джай айланы салкъыны.
Джумушакълыкъ этмесенг
Инджитириксе халкъынгы.

Кесин бегитмей чыкъгъаннга
Башха болмай бир джауса,
Сау дунияны башында
Эм белгили бир тауса.

Ма энтда бир къысха назмусу чалкъычы джашларыбызгъа.
Семенланы джырчы Исмаил.

ЧАЛКЪЫГЪА ЧЫКЪГЪАН КЮН,

Хайда,джашла,туругъуз,
Бирден чалкъы чалайыкъ!
Бу къышлыкъны джашил тюгюн
Ариу джюлюб алайыкъ.

Бусагъатда эринмесек
Къачда,къышда солурбуз,
Джашил хансны бичен этсек
Май борбайлы болурбуз.

Кенг джайлыкъны ханс езеги
Къыш сют болуб къуюлур,
Джибек кибик гелеу кырдык
Согъум болуб союлур.

Хайда,джашла,туругъуз
Бирден чалкъы чалайыкъ.
Бу кюнбетни джашил тюгюн
Къалдырмайын алайыкъ.

а джемиш незатды?

Добавлено (06.02.2011, 19:43)
---------------------------------------------